Вӧралысь, снайпер

Олӧ-вылӧ Кулӧмдінса Мыс сиктын морт. Важӧн нин квайтымынысь йӧткыштчис, сизимдаслань матыстчӧ.

Тайӧ мортыс — Серафим Григорьевич Опарин, буретш сійӧ видзӧдö миян вылӧ снимок вывсянь. Вӧралысьлӧн да снайперлӧн лэчыд синъясӧн видзӧдӧ. Ми аддзам Серафим Григорьевичлӧн морӧс вылысь уна боевöй награда, на лыдын — Боевöй Краснöй Знамя орден. Сійӧн коми снайперӧс наградитісны фашистъясӧс бура дітшйӧдлӧмысь.

Со мый та кузя гижліс 1942 воын но­ябрь 16-ӧд лунся номерын «Правда» га­зет: «Калининскӧй фронт вылын боецъяслӧн котыр, Панченко ёртӧн юрнуӧдӧмӧн, уськӧдчыліс враглӧн гарнизон вылӧ. Разведчикъяс сотісны танк да жугӧдicны немеч батальонлысь штаб. А капитан Сурановлӧн снайперъяс ӧти лунӧн виисны 52 гитлеровецӧс. Öтнас Опарин ёрт лыйис нёльӧс. Öні сылӧн «тшӧт» вылын 303 фашист».

Татшӧмтортӧ, дерт, эз быдӧн вермыв вӧчны. Татшӧмтор вылад колö повтӧмлун и мудерлун, а сідз жӧ лэчыд син да бур сой вын.

Буретш ставыс тайӧ и лӧсяліс коми зон Серафим Опаринлы. Öд сійӧ дас арӧссянь уяліс-вӧраліс парма-ягъясті, мыйта зверь-пӧткаӧс лыйис война вылӧ мунтӧдз.

— Заводитлі вöравны кремнёвка-пищальӧн,— зэв нимкодьпырысь казьтылӧ Серафим Григорьевич. — Пуысь сизьдӧм порошнича кыскалан, сутуга моз нюжӧдӧм свинеч. Зарадитігӧн свинечсӧ пуля мында курччан да и сюян стволӧ. Урыдлы вӧлі лыя со кыдзи: боксяньыс кӧ — пель вужъяс, а водзсяньыс кӧ — кык син костас. Мед не тшыкӧдны кусӧ. Тайӧ менӧ бура велӧдіс лыйсьынытӧ.

— Ошъяскӧд, дерт, ковмыліс жӧ паныдасьлыны? — юася. — Сы дыра вӧралігöн?

— А кыдзи нӧ… — муртса тӧдчана нюмъёвтö Серафим Григорьевич. — Дас кыкӧс лыйлі… Эг повлы ошсьыд, кӧть эськӧ сылӧн черыс и пуртыс век сьӧрсьыс. Метра дас-дас витӧдз вӧлі сибӧдча, мед нин бурджыка веськавны. Лыйтӧдзыд сійӧ оз уськӧдчы морт вылад, ачыс дзӧръялö пышйыны. Ранитан кӧ, сэки жӧ пурас-а.

Фронт вылын вӧралысьлы сетісны оп­тическöй прицела снайперскöй винтовка, и ковмис кыйöдчыны кык кока зверъяс бӧрся. А найӧ мудерджыкӧсь вӧлӧмаӧсь ошкысь и туланысь, асьтӧ кокыштны кыйӧдчӧны, немечыдлöн снайперъяс ӧд aбу жӧ йӧйӧсь.

«Правда» газетын гижлӧм бӧрын нӧшта на уна фашистӧс чергӧдіс снайпер Опа­рин, сэсся весиг пикируйтысь самолёт уськӧдіс. Снайперскöй винтовкасьыс жӧ бензобакас лыйӧмöн. Войналӧн сьӧкыд туйяс вылын унаысь ранитчыліс, бӧръяысьсӧ Польшаын. муртса эз кув, дыр куйліс госпитальын…

А Отечественнöй войнаӧдз Серафим Григорьевич вӧвлі и действительнӧй служба вылын армияын, и финнъяскӧд война вылын.

Сідзкӧ, позьӧ шуны, би пырыс н ва пырыс мунӧм коми мортӧс ми аддзам журнал мышкын фото вылысь.

И. ТОРОПОВ.

Войнаса да уджвывса ветеран Серафим Григорьевич Опарин.

Снимайтіс В. Вещицкий.

Войвыв кодзув, 1980, 6 №.