Победаыс вывті дона

Унаысь шензьывла: сэтшӧм кокниа киссис СССР, чоя-вока кодь республикаяслӧн ёртасьӧм. И Россиялӧн бырины гырысь предприятиеяс, заводъяс да фабрикаяс, гуӧ веськалісны промышленность да видз-му овмӧс. Паськалӧ уджтӧмалӧм, йӧз олӧны тшыг нисьӧ пӧтӧн. Унаысь шулам: ыджыд война со вермим фронтъяс вылын, и тылыс зумыда сулаліс. Кӧть став олӧмсӧ кутісны нывбабаяс, пӧрысьяс да челядь, эз эжмыны муяс, эз чин скӧт лыд, эз киссьы промышленность.

Бадьёльйылын «Выль войвыв» колхоз пуктіс Вӧль ю пӧлӧн 800-ысь унджык гектар видз, 600 гӧгӧр гектар му. Война юӧрыс медводз шемӧсмӧдліс сиктсаясӧс. Буретш лӧсьӧдчисны петны гожся страдна вылӧ. Быдӧн гӧгӧрвоис: унаӧс сиктсьыд босьтасны. Но мый та мындаӧс, да нӧшта сы мындаӧн бӧрсӧ оз воны — сэки эз на чайтны. Медводдзаяскӧд тшӧтш нин ас машинанас (уджаліс шоперӧн Пожӧгса МТС-ын) нуисны менсьым медыджыд вок Андрей Егорович Уляшевӧс. Сылы вӧлі 45 арӧс. Арнас мунісны Веня вок да Гриша Васька зять. 1942 воын ас кӧсйӧмӧн муніс Клавдия чой, а 1943-ын — Ӧлексей вок да Андрей воклӧн Ӧльӧксан пиыс. 44-ын ӧчеред воис и меӧдз. Сідз, Вась Петыр Ёгор (бать) война вылӧ сетіс тшӧтш отделение, а Устинья Филипьевна мам кевмысис 7 пи да 1 ныв вӧсна. Сӧмын тай 6-ыс бӧрсӧ эз воны. И Ӧндрейлӧн Ӧльӧксаныс 1945 вося майын нин усис Чехословакияын.

Бадьёльйылысь ставыс мунліс 154 морт, а ловйӧн локтісны 68-ӧн. И найӧ нин кувсисны, да талун ловъяӧсь сӧмын кык ветеран – Иван Егорович Уляшев да ме.

Збыльысь, курыд дойӧн шедіс Победаыд. Кӧть войнаса ветеранъяс бырӧны, но сиктыс пыр пыдди пуктӧ тайӧ лунсӧ. Сиктшӧрса чой йылын сулалысь обелиск дорӧ волӧ том и пӧрысь, казьтыштӧны фронт вылын тышкасьысьясӧс и тылын уджалысьясӧс. Обелиск вылӧ латунь листӧ гижӧма 112 усьӧмалысь ним-овсӧ. Дыр кежлӧ казьтылӧм вылӧ. Аттьӧ, бур йӧз отсӧгӧн кыптіс обелискыс. Латунь листсӧ графируйтісны Сыктывкарса механическöй заводын, интасаяс кисьтісны чугунысь звезда да краситнысӧ сетісны нитроэмаль. Авторнас вӧлі ме. 1970-ӧд воын сэсся сиктсаяс сорӧн кыптіс из-кӧрт сора бетон обелиск. Весиг посни челядь изсӧ тшӧтш ӧктісны да мыськисны.

Письмӧсӧ гижигӧн юрӧ воисны кывъяс, кодъясысь сэсся артмис кывбур сяма.

Кор фашист-зверлы водзӧс вештім,

Сэк аддзис мирыс — кутшӧм этшным.

Сюрс нёльсё дас кӧкъямыс сутки

Вир кисьтан косьын пайсӧ пуктіс.

Кор знамя лэптіс Рейхстаг вылӧ,

Роч воин чышкис война ньылӧм.

Став вынсӧ Победалы сетіс,

И радлӧ — кӧть синваыс петіс.

         Е. УЛЯШЕВ.

Бадьёльйыв.

Парма гор, 1999, Май 8 лун.