Салдатыдлöн правдаыс öти

Воысь воö пыр этшаджыкöн кольöны Великöй Отечественнöй войнаса ветеранъяс. Со и Пожöгдiн сиктын колисны сöмын кыкöн — Закар Вась да Гриша Миколай. Нöшта куим пожöгдiнса — Öвер Педьö, Степан Кöсьта да Öльöксан Иван, олöны талун чужан сиктсьыс мöдлаын. Быдöнлöн аслас судьба, туйвизь… Талун ме кöсъя висьтыштны Гриша Миколай — Николай Григорьевич Третьяков йылысь. Стöчджыка кö, сылöн военнöй туй йылысь.

Чужлiс Николай Григорьевич 1926 воын Пожöгдiн сиктын. Война пансигöн сылы вöлi 15 арöс. Мунiсны фронт вылö верстьöяс, сэсся и томджыкъяс. Коркö босьтiсны и 1925 воын чужлöмаясöс, сэсся – 1926 воын чужлöм йöзöс. Дас сизим арöсаясöс, позьö шуны, челядьöс.1943 вося октябрь 24 лун. Тайö лунсö Николай Григорьевич некор оз вунöд. Тайö лунö сылы сетiсны фронт вылö повестка.

— Кер лэдзам сэк вöлi Ыджыд кöджын, Сьöдтыдiн дорын, — казьтывлö Н.Г. Третьяков. — Чукöртiсны миян арлыдаясöс и сеталiсны повесткаяс. Ми ылöсас тöдiм нин, мый армияö босьтасны. Öти арöсöн ыджыдджыкъясöс кызвынсö нуисны нин. Кöть меным и повестка сетiсны, 17 арöс эз на вöв, бöрынджык тырис. А сэсся миянöс чукöртiсны Кулöмдiнö. 286 морт ыжъяс моз мунiм Айкатылаöдз подöн. Сöмын нопъяснымöс доддьöн нуисны. Айкатылаын сöлöдiсны тöварнöй эшелонö и нуисны Архангельскö. Сэсянь Северодвинскö. Вочасöн миянöс öта-мöдысь торйöдалiсны. Пожöгдiнысь мекöд öтлаын тшöтш веськалiсны Пиш Миш да Арсень Вась, а Пожöг Вичкодорысь – Иван Öндрей да Иван Априкан.

Северодвинск-26 – тадз шусис миян частьлöн местаыс. Сэтчö американскöй да английскöй суднояс ваялiсны Россиялы техника да сёян-юан. Сэсся локтicны Вöлöгдасянь военнöйяс да кутiсны миян пöвстысь бöрйыны 6-7 класса образованиеа йöзöс, мед велöдны радиосвязь кузя учебкаын. Менö босьтiсны жö. Став тöдсаясысь торъялi. Учебка бöрын миянöс, 92 мортöс, босьтiсны маршевой ротаö. Сiдзкö – фронт вылö. Веськалi 3-öд Белорусскöй армияö, кодöн веськöдлiс генерал Черняховский. Первой Украинаын вöлiм, а сэсся Литваын. Мунім Каунас пыр, вуджим Неман ю. Воим Асыввыв Пруссияöдз, Кёнигсбергöдз 70 километр коли. Аддзылiм немечлысь оласногсö. Матькам вöлi: мый чöртыс, мися, немечлы эз тырмы, мыйла сылы колiс миян вылö уськöдчыны? Немеч керкаад пыран да быттьö дворечö веськалан. Пöдвал тырыс – картупель. Вылынджык жырйын – шобдi тусь да пызь. Крöватьын – электрическöй кнопкаяс. Вывтi бура, вöлöм, олöны. Но воисны Россия вылö, и налысь олöмсö Россия буракодь кисьтic. Жаль сöмын, мый öнiя Россияöс асьсö войнатöг кисьтöны, пытшкöссяньыс.

А Пруссияад немечыд чорыда водзсасис. Ассьыс мусö эз кöсйы сетны. Сэнi меным война и помасис. Ме салдатöн вöлi, связнöйöн. Вая вöлi фронт вывсянь штабö донесение, и рöкыд вылö веськалi бомбитöм улö. Осколокъяс кокöс жугöдiсны. Бöрыннас шуисны, мый асланым лётчикъяс бомбаяссö шыблалöмаöсь, фронт линиянас сорсьöмаöсь. Öти здукöн 9 автомашина миянлысь пасьвартiсны. Война вылад быдторйыс овлö. А менö медводз кыскисны медсанбатö, сэсся госпитальö. Öнi верма шуны: мыйта виисны фронт вылын йöзсö, кык сы мында кулiс госпитальын. Аслам синмöн аддзылi. Вайисны госпитальö, а 500 морт вылö öти санитар. Мый ciйö öтнас вермас вöчны? Меным мойвиис – петкöдiсны операция вылö. А сы бöрын вайисны Инстенбургö. Кык тöлысь чöж куйлi гипсын, а сэсся мöдöдicны Россияö. Вайисны Литваö, Двинскöй крепостьса госпитальö. Танi, дерт, фронтöвöй госпитальын серти условиеяс бурджыкöсь вöлiны. Литвасянь нуисны Кировö, 1100 километр ылнаö. Дзонь эшелон раненöйяс. Сэн бара разöдiсны. Ме веськалi Слободскöйö. Нёль тöлысь гипсын куйлi. Кокöй пежасис, дуксьыны кутic. Эз и бурд помöдз. Гортö воöм бöрын Сыктывкарын выль операция вöчисны, да вöлисти лöсялыштiс. А сы бöрын 6 операция нин вöчисны.

Со тадз артмис, мый война меным помасис 1945 вося февраль 1 лунö. А менам ранитчöм бöрын 10 лун мысти виöмаöсь миянлысь командующöй генерал Черняховскийöс.

Ми унатор йылысь сёрнитiм Николай Григорьевичкöд. Тöрытъя, талунъя, аскиа олöм йылысь. Ме юалi сылысь: эм-абу война йылысь киноясын збыльыс, салдатскöй правдаыс? Николай Григорьевич думыштчис здук кежлö, а сэсся вочавидзис: «Салдатыдлöн правдаыс öти — чеччы, кöмась-пасьтась, и мун. Сэтчö, кытчö тшöктасны». Ставыс ясыд, ставыс гöгöрвоана. А вот талунъя олöмыс – гöгöрвотöм.

— Нёль воöн Гитлер миянлысь пöшти став заводсö кисьтiс, а ми во-мöдöн выльысь олöмсö ловзьöдiм, — майшасьöмöн шуö Н.Г. Третьяков. — A öнi 15 воöн асьным асьнымöс кисьтiм! Шензьыны ог вермы. Ми пöрысьöсь нин, олöмсö олöма, а кыдзи овны томъяслы? Со орччöн мекöд пилöн 5 морта семья олö, неважöн 40 шайт аванс сетлiсны. Кыдзи вердны челядьсö? Ыджыд чина йöз сöмын ас йывсьыныс думайтöны. Водзын вой кöть лун уджав, пыр уджтö аддзасны да сетасны. A öнi – уджтöмалысьяс! Шензя…

Унатор шензьöдö ветеранöс öнiя олöмас. Унатор ciйö оз вермы гöгöрвоны. Кыдзи и кызвын олöма йöзыс. «Мый вöсна тышкасим? — юалöны мукöдыс ассьыныс. – Татшöм олöм вöсна öмöй?» А сэсся асьныс жö и вочавидзöны: «Рӧдина вöсна». Олöмыд овлö разнöй, а Рöдинаыд – öти. Сiйöн и некод да некор мед оз вунöд Рӧдина дорйысьястö. Тшöтш и Пожöгдiнысь Николай Григорьевич Третьяковöс. Кузь нэм да бур шуд тiянлы, Николай Григорьевич!

А. ШЕБЫРЕВ

Парма гор, 1999, Март 23 лун (34 №).