Воöдчис Берлинöдз

Вомынбöжысь ыджыд война вылö босьтлiсны 80 мортöс. Бергöдчисны бöрсö сöмын 15-öн. На лыдысь талун ловъя Василий Павлович Сенькин.

17 арöс на эз вöв, кор воис повестка мунны фронт вылö. Тайö вöлi 1943 вося октябрын. Сьöкыд вöлi лэдзны писö мамлы ылi роч муö, кöнi ыджыд вынöн мунiсны тышъяс. Василий сизим чоя-вока пöвстын вöлi медыджыдöн. Бать-мамлöн медшöр отсасьысь.

Василийкöд тшöтш Пожöг вожысь фронт вылö мунысьыс чукöрмис уна. Нуисны Архангельскöдз. Сэсянь разалiсны кодi кытчö. Зон веськалiс стрелкöвöй полкö. Кытчö сöмын эз вайöдлы коми салдатöс фронтöвöй туй. Украина, 1-й Прибалтийскöй, 3-öд Белорусскöй фронтъяс.

Шауляй кар босьтöм лоис зэв тöдчанаöн. Василий буретш вöлi разведотделениеын. Веськöдлiс котырнас Пожöгса ёртыс, Африкан Шахов. Карö пырöмсö налысь казялiс немеч. Пестiс би. Ыпнитiс ыджыд тыш, кöнi Василий сьöкыда ранитчис. Фронтдорса госпиталь, сэсся Москваса бурдöдчанiн. Бöръяас вöлi квайт тöлысь чöж.

— Эг нин чайт, мый ловзя, — висьталic ветеран. — Вöрöглöн мина нуис тшöка джынйöc, бур специалистъяс кыдзкö дöмлiсны, сувтi кок йылö, пeтi стройö.

Веськалiс запаснöй стрелкöвöй полкö, а сэсся 133-öд миномётнöй полкö. Тыш бöрся тыш.

Кар бöрся кар босьтiсны миян салдатъяс. На лыдын и Кёнигсберг, кодi шедiс эз кокниа. Киссис уна вир. Став вын чукöртöмöн, повтöг зырисны вöрöгöс, воöдчисны Германияöдз.

Василий Павловичöс лэдзисны гортас сöмын 1950 воын. Войнаса мöдӧд группаа инвалид. Бергöдчис морöс тыр наградаöн. На лыдын: «За отвагу», «За взятие Кёнигсберга», «За Победу над Германией в Великой Отечественной войне 1941-1945 гг.» медальяс, мöд тшупöда Отечественнöй война орден.

Уна нимкодьлун вайис бать-мамлы, чой-воклы. Помтöм сёрни, войнаса биа тышъяс йылысь казьтылöмъяс.^: Недыр шойччöм бöрын пырис уджавны Помöсдiнса вöр овмöсö. Уна во дöзьöритiс вöр-ва. Гöтрасис. Стрöитчис ас сиктö, лöсьöдас ыджыд овмöс. Радейтана Аннакöд, ыдждöдлöмöн кö, Анна Варфоломьевнакöд, олiсны öтув 57 во. Никодьлун и шог, шудлун и быд удж юкисны шöри. Быдтiсны, петкöдiсны асшöр ордым вылö сизим ныв-пиöс, кодъяс разöдчисны кодi кытчö. Олöны асланыс семьяöн. 14 внук-внуч­ка, 5 правнучка. Овны да овны, но муса гöтырыс Василий Павловичлöн кувсис. Пыр на оз вермы петны шогсьыс. Сьöкыд уджыс тöдчис аньлы. Ыджыд пай пyктic видз-му овмöс сöвмöдöмö, пыр уджалic скöт дорын. Cюрлic уна сьöкыд. Ели­завета нылыс дiнас, отсасьö батьыслы. Оз вунöдны ветеранöс и сиктсаяс, пыравлöны видлыны, верманаöн отсыштöны.

Парма гор, 2008, Апрель 26 лун.